محدش فكر قبل كده لو انه لو لقى مصباح علاء الدين ولا خاتم سليمان وطلعلو العفريت العريان بتاع كل مره .. حيطلب منه ايه؟؟؟
في يوم من الأيام كنت راكب على العجلة بتاعتي وماشي في الصحرا بشم شوية هوا ، لقيت حاجة بتلمع وسط كومة رمل كبيرة اوي لفتت انتباهي ، ركنت العجلة بتاعتي وحاولت اوصل لقمة كومة الرمل دي علشان اشوف ايه اللي بيلمع ده يمكن يكون ازازة كازوزة ولا حاجه ، أخيرا بعد عناء ومعاناة سف التراب وصلت لقمة الهرم الرملي واتفاجئت جدا لما لقيت ان الشئ اللي بيلمع ده حاجة كده شبه مصباح علاء الدين.. طبعا ساعتها الفرحة ماكانتش سايعاني ، لاني تخيلت بقى اني حدعك الفانوس وحايطلعلي منه العفريت اللي مش لاقي هدومه واطلب منه اللي انا عايزه ، طبعا حتكون اول امنياتي انه يجيبلي ازازة كازوزة اتنين لتر (لاني أكيد حكون ميت من العطش من كتر التمشية في الصحرا) وطبعا حتكون الامنية التانية انه يفتحهالي (لاني اكيد مش حكون شايل معايا فتاحه) وكنت ناوي اغلس عليه في الاخر واطلب منه انه يرجع الازازة ويجيب الرهن.أخوكم ماكدبش خبر، اتجهت رأسا ناحية الفانوس ومسكته وفعلا دعكته ومحصلش حاجه.. دي كانت خيبة امل كبيرة.. لكن انا مايأستش حاولت مرة تانيه.. لكن المرة دي لقيته بيتهز وهو في ايدي وبعدين لقيتو طلع بخار والجو اتقلب .. ساعتها عرفت ان طاقة القدر اتفتحتلي.. دلوقت حشوف العفريت واطلب منه الكازوزة وكمان الرهن..طلع العفريت .. واندهشت اندهاش شديد لدرجة ان فكي السفلي وقع مني في الرمله لما سمعته وهو بيقول.. مين ابن التييييييت اللي دعك الفانوس بتاعي؟؟! هو الواحد ميعرفش يناملو ساعتين في الصحرا بنت التيييييت دي؟؟! وبعدين مين ابن التيييت اللي قاعد بيلغي الشتيمة بتاعتي؟؟! حعرف اجيبو ابن التييت ده بس لما اخلص ابن التيييت التاني اللي دعك الفانوس!!!... يانهار ابيض .. ايه العفريت الصايع اللي طالع بيتخانق مع دبان وشه ده؟؟؟ مش ده اللي انا تخيلته خالص..طبعا حاولت الاقي حته استخبى فيها بس مالاقتش لاني الشخص الوحيد اللي واقف في الصحرا دي وماسك ايس كريم.. شاورت على اللي جنبي وقلت : هو دي ياباشا اللي دعك الفانوس ، بس مكانش فيه حد واقف جنبي ،انا قلت مابدهاش استسلم لقدري المنيل اللي مستنيني.. كان يوم منيل لما اجرت العجلة من الواد حمادة اللي على ناصية شارعنا .. قاطعني العفريت وقالي : انت بقى ابن التييت اللي قطعت عليا خلوتي ودعكت الفانوس ياد؟؟! وبعدين ايه العجلة المسخرة بنت التييت اللي انت جايلنا بيها دي؟؟ هي ناقصه شلل؟؟؟!!
يتبع...
