للكذب فوائد كتيره اوي الفوائد دي صحيح مش واضحة بس كلنا عارفينها:
-أولا بيقولوا ان حبل الكذب قصير يعني مش حاتحتاج اكتر من 7 سم ونص.
-ثانيا ثبت علميا (بجد المعلومة دي) ان لما الانسان بيكدب مناخيره بتطول بمقدار ضئيل جدا .. يعني اللي عايز يعمل عملية تجميل بس مش عارف .. كل اللي عليه انه يستلم واحد من اللي هما جايين الدنيا مانعرف ليه ويغني عليه.
-ثالثا يعمل الكذب على توثيق وتوطيد الروابط الاجتماعيه بمختلف انواعها والنفاق نوع من انواع الكدب .. زي لما تكدب على صاحبك وتقوله شكلك حلو ياد النهارده وهو يكون صاحي من النوم ومابصش في المراية بس خلينا نضحك شوية.
-رابعا يساعد الكذب على الهروب من بعض المواقف المحرجة التي نتعرض لها يوميا .. مثلا عندما تسألك زوجتك عن الاكل فتقول لها بنصف ابتسامة : اممممم الأكل زي الفل تسلم ايدك ياروحي.. ولكن في الواقع بدون الكذب يكون ترجمة الكلام كالآتي: يعععععع الاكل مالح اوي كنت اكلت عند عم طاعون احسن.
-خامسا يساعد الكذب في الشعور باحساس افضل طبقا لنظرية الممنوع مرعوب وخايف (ماعليهاش نقطة).
-سادسا عدد الاشهر المسموح اللي نكذب فيها 11 شهر (يابلاش) طبعا ماعدا شهر ابريل لانك لو كدبت في شهر ابريل حاتتمسك وحاتبقى عبره لكل شخص بيشتري حبال قصيره .. علشان كده سموها كدبة ابريل.
-سابعا لو عايز تبقى تاجر شاطر اكدب على كل زبون يعدي عليك واعملوا البحر طحينه.. معظم الشركات بتستفيد من ميزة الكذب في زيادة ارباحها عن طريق التمويه على السلعه المراد بيعها .. وزي مابيقولوا التاجر الشاطر سلاحه لسانه.
-ثامنا لما تكدب حاتلاقي حته تروحها لما تموت طبقا لنظرية العيال اللي بتقول اللي يكدب يروح النار.. لان فيه ناس مجموعها مايوديهاش لاجنه ولا نار.
-تاسعا اللي يكدب ممكن يسرق ، ممكن ينهب ، ممكن يختلس .. والله يابلاش كورس اجرام كامل فول باكيج فايف ستارز .. بس اوعى تتمسك.. ولو اتمسكت ، أنا ماعرفكش .
أعتقد دلوقت انا عرفت ليه ابو الهول مناخيره كانت مقطوعه..
